الدوائر الحكومية

السلام عليكم ورحمة الله وبركاته:

اليوم بدي احكي بالعامية واريح حالي .

احلى شي عنا بلأردن مراجعة الدوائر الحكومية واحلى شي بهالدوائر الحكومية دائرة الأحوال المدنية وخصوصا اربد اللي بنحبها كلنا وبنعشق ترابها لانه موطن روسنا. انا رحت على الأحوال المدنية اللي بإربد منشان اطلع دفتر عيلة مترجم للغة الأنجليزية لانه هيك طلبوه مني السفارة كوني بعمل معاملة هجرة لأولادي. اول شي بلاقوك السماسرة اللي حولين الأحوال اصحاب المكاتب وتبعين الأستدعايات تفضل يا استاذ احنا بننهيلك كل معاملاتك الثاني بنادي عليك تصوير استاذ طوابع يامعلم المهم بضل هيك حتى توصل الباب الرئيسي للأحوال المدنية وبتبدأ تتطلع الدرج اللي مزحوم بالناس والعالم اللي جايين منشان يلحقه دور ويقدر يخلص معاملته بنفس اليوم منشان مايردش يرجع على اربد. بتخلص اول شاحط درج والثاني ومابتوعى الا انتا راجع للشاحط الأول مع وجع براسك من حم اللخمة اللي لخمها راسك بسقف الدرج الواطي اللي شوي ثانية بدو يوصل على الأرض, سلامات يااستاذ قوم ان شاءالله مافيك شي طبعا بتقوم وانتا نفسك بتلعي وبتحس حالك زي الحامل وبدها ليمون وبتكمل الدرج حتى توصل نسوان مرمية على جوانب الدرج بتستنى دورها وبعدين بيجيك صالة كبيرة كثير وملانه ضباب ودخان و قارمة اكبر من قارامات الشوارع مكتوب عليها ممنوع التدخين تحت طائلة المسئولية, وبتلاقي الموظف ورى الكاونتر بدخن وبشرب قهوة ولا هو تحت طائلة المسئولية وبتحكيله ياخي مشينا بقلك مش شايف الشغل فوق راسي وطبعا بيكون يطبع بيد وحدة وبأصبع واحد على الكيبورد واليد الثانية بيشرب فيها قهوة. و المراوح اللي بالسقف بدها تقص راسك اللي نفذ من خبطة الدرج من كثر ما هي واطية, اللي كويس بالموضوع انه في ارقام وفي دور يعني نظام يعني شغلة حلوة.... بس هات لاقي اللي بدو يعطيك الرقم المهم لقيناه واخذنا رقم وقعدنا نستنى دورنا تحت المروحة اللي بتلف على الفاضي والحر والجو الملوث وبعد نص ساعه تقريبا صار رقمي ورحت على الكاونتر وحكيتله ان بدي اطلع دفتر عيلة قال ممتاز بس احنا بنعطيك نسخة عربية وانتا بترجمها برة عند مترجم معتمد وبتروح بتصدقها من كاتب العدل وبتاخذ المترجم معك منشان يحلف اليمين عند كاتب العدل انه هذا الدفتر تبعك وانك انتا ابوهم لولادك مش حدا ثاني وانا هون صار سمعي يخف شوي شوي وحاسس انه الصالة كلها بتلف فيي وحاسس بحالة خدران مش طبيعي من كثر الطلبات اللي قاعد يطلبها مني الموظف.

الي بدي احكيه هون انه لطالما الأحوال المدنية بتصدر شهادات ميلاد بلانجليزي ليش ما تصدر دفتر عيلة بلانجليزي وتريح المواطن والبلد من الروتين الممل اللي ما اله داعي يعني بدل ما ينققضى على الواحد وهو ينجز معاملاته بالدوائر تكون الامور ابسط من هيك بكثير.

وسلامي الى الكل المواطنين والذين يغارون على مصلحة الوطن.